Meiðsli

Fór út að skokka seinnipartinn og ætlaði að ná 30 km, var í fínum gír og rúllaði +/- 5 tempó, alveg niður undir 4:30. Var heitara en ég bjóst við og kláraði fljótt vatnið sem ég var með. Á km 22 fann ég sársauka undir vinstri ilinni innanverða og uppgötvaði að það þarna voru komin gömul meiðsl, einhverskonar tognun eða slit í sin/vöðva sem liggur í stóru tánna, ekki neitt stórt en þeim mun meira pirrandi því það er varla hægt að hreyfa sig án þess að finna fyrir þessu. Ís og íbúfen verða að vinna á þessu....!

23 km lágu í dag á ca. 5: 15 meðaltempói.

Storfjellet & Tyven

Frá íbúðinni minni get ég hlaupið á tvö fjöll hér skammt frá, bæði eru 400m há en leiðin á Storfjellet er 5 km löng og á Tyven 7,5 km. Íbúðin er í 100m hys svo það er minni hækkun upp á Storfjellet sem er hér ofar í brekkunni, til að fara á Tyven þarf ég að hlaupa niður að sjávarmáli fyrst. Báðar leiðirnar eru skemmtilegar, þótt mér fynnist leiðin á Tyven skemmtilegri enda meira utanvegar og brött í restina og tekur vel á, hún er líka passlega löng eða 18 km á móti 10 km.

Skaust á Storfjellet áðan og náði að bæta tímann, var 26:41 á móti mínu gamla PB 28:00. Hef grun um að ég geti farið undir 25 mín strax eftir sumarfrí. Stefni hinsvegar á 42 mín á Tyven, en ég á um 47 mín núna.

Stefnt á að ná þessu fyrir 1. ágúst, 7, 9, 13!

18 km

Rúllaði mína klassísku 18 km upp á Tyven, hljóp nú erfiðasta hlutan næstum allann, enn smá snjór eftir. Á að klára þetta á mánudaginn, ef helgin verður ekki of erfið. Eftir æfingar síðustu helgar skellti ég mér á Storfjellet (5 km, 400m hátt), sami halli nánast alla leiðina og þá festust lærin í hálfgerðum krampa og varð ekkert úr þeirri bætingu sem ég ætlaði að ná.

Miðvikudag var ég að vinna frá 06:30 - 23:30 og upp 05:30 á fimmtudeginum þannig að það varð lítið um hlaupaafrek þá dagana. Vonandi verða færri heimsóknir frá Osló og viðskiptavinum næstu mánuðina því heilu dagarnir hverfa þar sem ávallt þarf að fara út að borða á kvöldin og komið seint heim, ágætt af og til en 2-3 dagar á viku síðustu misserin geta gert mann ansi þreyttan.

gírinn

Held að ég sé búinn að finna gírinn, búið að vera mikil vinna og stress í vetur/vor og endalaus yfirvinna. Auk þess hefur verið mikið um heimsóknir í vinnuna og þá er alltaf farið út að borða og komið heim um miðnætti. Nú er hinsvegar komið gott veður og hlaupin sett í forgang og hægt að velja allskyns fjallaleiðir til að hlaupa og þá er maður geim í hvað sem er.

Náði góðu hlaupi í gær á leið sem ég hljóp mikið í fyrra, góðar brekkur upp í 400m hæð og svo 10 km leið niður sem æfir vel lærvöðvana og hægt að dúndra á góðum hraða.

Í dag fór ég upp á Storfjellet, tæpir 10 km tur/retur en stífnaði ansi fljótt og varð því enginn mettúr þangað upp eins og ég taldi mig geta náð þegar ég var að græja mig.

Grill og smá hvíld í kvöld...!

Skokk

Búið að vera ansi mikið að gera undanfarið í vinnunni frá því í eftir Páska og lítið um hlaup en hef þó náð að taka nokkra spretti inn á milli og slatta af fjallgöngum. Hef hinsvegar verið latur að skrá það.

Gott veður í dag, hátt í 20 gráður og tók ég einn hring upp á Tyven (sem er á forsíðumyndinni) og veginn heim, 18 km á 1:50 eða svo. Ennþá snjór á veginum eftir kaldan maí mánuð en nú er spáð hátt í 20 gráðum um helgina svo það er bara að dúndra vel á æfingarnar + fjallgöngur. Brattasti hluti Tyven er ekki ennþá frír af snjó en þegar það verður reynt að hlaupa þangað upp í einum strekk.