Snjóþrúgur

Vikan byrjaði með tveimur svefnlausum nóttum og einni svefnlítilli og var því orkan eftir því, æfingar rólegar og stuttar þri og í dag. Vonandi verð ég kominn á rétt ról á morgunn og kannski ég nái morgunnhlaupi.

15 dagar þar til sólin kemur upp, alltaf viss tilhlökkun, farin að sjá bjarma á himninum og verður hann meiri með hverjum deginum sem líður.

Keypti mér snjóþrúgur sem jólagjöf handa mér, en hér er enginn snjór kominn að ráði svo það tók smá tíma að finna nægan snjó til að finna prófa þær. Voru mun léttari en ég átti von á og hljóp ég meira að segja smá spöl á þeim en þegar ég tók þær úr kassanum átti ég ekki von á að ég gæti gert það, amk ekki almennilega þar sem þær virkuðu stórar. En sökum þess hversu léttar þær eru þá var það lítið mál, en ég er nú ekki að fara að hlaupa marga km svona í byrjun, fannst 50m alveg nóg!

Hlaup þriðjudag: 10,6 km
Hlaup miðvikudag: 7 km

Vindur

Nú er kominn klassískur Síberíuvindur hér í Hammerfest, mínus slatti af gráðum og 20-30 m/sek. Ómögulegt að sofna síðustu nótt fyrir látunum og var því frekar þreyttur í dag og sofnaði eftir vinnu. Fór því frekar seint í ræktina og lítill tími fyrir hlaupaæfingu eftir hana. Hlaupatúrinn varð stuttur enda fokhvasst og hált. En fannst betra að taka stutta æfingu en að sleppa henni.

Ræktin: 1 klst
Hlaup: 5km

Fyrsta fjallganga ársins

Haustið 2010 gekk ég mikið á fjall hér í nágrenninu, 10 km leið og ca. 300m hækkun. Gerði þetta til að fá meiri fjölbreytileika í æfingarnar og gekk þá frekar greitt upp fjallið.

Fór tvisvar á milli jóla og nýárs og svo í dag. Túrinn tekur ca. 1:40.00 og hlusta ég vanalegast á podcast á meðan sem ég hleð niður á iTunes, t.d. frá Endurance Planet sem er með mörg góð podcöst eftir þríþrautarkappann Ben Greefield, einnig er Ultrarunnerpodcast með mikið af góðum viðtölum. Fínt að fá ýmsar pælingar varðandi æfingar, matarræði o.fl. meðan gengið er. Finnst einnig gott að hlusta á podcastið á löngu æfingunum.

Ætlaði líka stuttan hlaupatúr en skyndilega blés upp með bálviðri og settist ég þá bara við arininn og byrjaði lesa jólabækurnar meðan öndinn grillaðist í ofninum :)

En nú er allt frí búið og vonandi næ ég að losa mig við kvefið sem hefur verið að angra mig.

2012

Í ár ætla ég að breyta aðeins um stíl og æfa meira markvisst en ég hef gert hingað til. Hef látið líðan hvers dags ráða hraða og lengd en nú ætla ég að setja meiri fókus á æfingar með púlsmæli og skipta fyrstu 6 mánuðunum í tímabil, þ.e. uppygging (löng og róleg hlaup + tempó), síðan bæta sprettum inn í og í þriðja fasa fjallahlaup (áhersla á að safna hæðarmetrum)

Reikna með 3 mánuðum í fyrsta fasa en svo fer það eftir veðri hvernig fasi 2 og 3 verða. Vonast eftir góðu vori sem ætti að hjálpa amk með fasa 3.

Nýtt ár

Hef tekið það rólega nú í haust, ætlaði að æfa betur en kvef núna síðustu 6 vikur hefur gert æfingarnar stopular. Held ég hafi aldrei verið kvefaður svona lengi áður. Hef náð nokkrum góðum dögum inn á milli en svo í sama farið þess á milli. Vantar örugglega allt koníak í mig!

2012 er ekki alveg full planlagt en ég er skráður í tvö hlaup, Rotterdam maraþon og Skåla opp, helsta "motbakke løp" Norðmanna. 8 km langt, 1820 metra hækkun. Ennþá hægt að skrá sig hér

Er skráður í lottóið í UTMB og fær svar um miðjan jan, er einnig (framarlega) á biðlista fyrir Hardrock 100, erfiðasta 100 mílna hlaupið segja þeir.
Heimasíðan hér: Hardrock 100

Svo planið 2012 lítur einhvern veginn svona út:

15. apríl Rotterdam maraþon
13. júlí Hardrock (ef ég næ inn af biðlistanum)
18. ágúst Skåla opp
25. ágúst UTMB

Reikna samt með að hafa önnur plön því að það er tæpt að ná inn í Hardrock, og gæti alveg eins dottið inn viku fyrir start!